|
|
 | |  |
| მთავარი » 2012 » სექტემბერი » 8 » ო, ჰენრი– ეკონია ფურცელი
8:48 PM ო, ჰენრი– ეკონია ფურცელი |
ნიუ-იორკის, დიდი ჸუდეშ ართ ჭიჭე თოლს ჟირი ხანტუ მაჸალე მილარედჷ. ართის სიუ ჯოხოდჷ, მაჟირას – ჯონსი. დალეფცალო ართო ოხორანდეს დო ხანდენდეს. კლიენტეფი ვანაფერო მალედეს დო ათეშენი შხირას ოჭკომალიშ ფარა ხოლო ვა უღუდეს. რინა იშენით უჸორდეს, ოხიოლუდეს მუჟამცჷთ მუნეფიშ ნახანტეფი ადამიერეფს მოწონდესჷნ დო დუც ირო ბედინერო გინაფულენდეს.
ქო დოდირთჷ გჷმათუთაქ. გალე ძალამი ჩხურუქ ქო დანთხჷ დო ირდღას ჭვენდჷ.
ართ დღას ჯონსიქ დელახჷ. დუც ძალამ გლახათ გინაფულენდჷ. დიდი სინჩხე უღუდჷ, მარა იშენით ჩხურუ აფუდჷ. პიჯი უსქირუდჷ დო დუც ძალამს აჭუდჷ.
თინა თელ მარას ილეხუანდჷ.
ართ დღას ექიმქ თქუ: „სიუ, მოკო მუდგარენი გიწუენ, ქო მორთი, აბარწაშა აწიბლათ.“
„სიუ, სქანი მაჸალე სერიოზული ლეხი რე. წამალეფი მუთუნს ვ’ახვარჷ, თიშენი ნამუდა სქილადას ვა ზალამენს. მიწუ, ნამუდა უსხუნ დოღურასჷნ. რინა მოძვილებურ კათაშო წამალეფი მუთუნიშ მოღე ვა რე.
სიუს ექიმი ვა უზარებჷ. აბარწას ქ’აწოსქიდჷ დო ნწარას ქ’აანგარინ.
- სიუ, ქო მორთი აშო“ – ქო დოუძახჷ ჯონსიქ.
- ხელათ ჯონსი, უკვე მოვული – უგამჷ სიუქ.
ოთახშა მინულირ სიუ უკვე ვ’ენგარდჷ, თინა იბირდჷ.
- ექიმქ მუ გიწუ, სიუ?“ – ქო კითხჷ ჯონსიქ.
- მიწუ, ნამუდა მუსხირენი დღაშა ირფელი მუკილენს.
- ვარი, მუსხირენი დღაშა ბღურუქ.
- თეშე ვ’ეფირქა დო ჯგირო იჸუაფუქ. ასე ჭე ოჭკომე ოკო. გემუან ოჭკომალს ქო გიღოლა.
სიუქ ოჭკომალიშ ხაზირაფა ქო დიჭყჷნ, ქო გეგონჷ, ნამუდა ჯონსი მუდგარენს კოროცხჷნდჷნ.
ონჯირეშა მეულირ სიუქ ქო ძირჷ, ჯონსი ოსინთეჸურე იჯინედჷ დო კოროცხუას აგინძორენდჷნ.
„ვითოჟირი, ვითოართი,,, ვითი, ჩხორო… ბრუო დო შკვითი“. სიუქ ოსინთეშე გეგმიჯინჷ. ოკოდჷ ქო გუგებუდჷკო მუს კოროცხჷნდჷ ჯონსინ. გალე ხვალე ოზე დო ქუაშ კიდალა რჩქჷდჷ, ნამუსჷთ ხილონძი ცურუ ოგვერდაშეთ ქო მოდვალჷდჷ. ჯას გვალო მუსხირენი დაჸვინთელებურ ფურცელი ქასქილადჷდჷ.
- ჯონს, მუს კოროცხჷნქ?
- ფურცელეფს ბკოროცხჷნქ. გოღა ვითოჩხორო ფურცელი მებუდჷ, ამუდღა ხვალე შკვით კაკალია ქ’ასქილადჷ. ეჰე! ხოლო ართიქ გამუკოლჷ. ამშვიქ დოსქიდჷ!
- ქო მარა, მუშენი კოროცხჷნქ?
- თიშენი ბკოროცხჷნქ, ნამუდა მუჭოთ ეკონია ფურცელი ქო გიანთხუ დიხასჷნ, მათ დობღურუქ.
- ჯონსი, ჩქიმი ოჸოროფული, ვა რაგადუა ათაშ.
- თაში რე, სიუ, მიჩქჷ, მუჭოთ ეკონია ფურცელი გამუკოლუნ, მა დობღურუქ.
სიუს მუთუნი ვა უგამჷ. თინა ინგარდჷ.
აბარწაშა გჷმილჷ, თინა დიო ხოლო ინგარდჷ მუ შვანსჷთ ბადიდი ბერმანი ძირუნ.
ბერმანი ხოლო ხანტუ რდჷ. თინა ხოლო თი ჸუდეს მილარდჷ, სოდეთ თენეფინ. სუმონეჩიშახ ქო მეუჭირინუაფუდჷ. ვართ ფერი ჯგირი ხანტუ გოხოლჷდეს, მორო ირო იჩიებუდჷ, „ბერმანს ირკოჩი გიაძიცანს, მარა იშენით დიდი ხანტუ რე, ართი დღა ხოლო ქიჸუაფჷ დო უსქვამაში ნახანტას დოხანტჷნს – მოსოფელს ირიშ უჯგუშის.“
ბერმანი კათას ვა უჸორდჷ, თიშენი ნამუდა ვართ ბერმანს გიოხანტუდჷ გურს თინეფი. რდილობათ ხოლო ვა გჷშმეგორუდჷ დო ირკოც გიაძიცანდჷ. ადამიერეფი თის ეგოისტო კოროცხჷნდეს.
–მუ გონგარჷ, ცირა – ძირაფაშვანსჷნე ქო კითხჷ სიუს.
– ეჰ, ჯონსი დიდო ლეხი რე, ექიმქ თქუ, ნამუდა წამალეფი მუთუნს ვა მეხვარებჷ, რახან რინა ვაკო დო ხილონძი ცურუშ ფურცელეფს კოროცხჷნს.
– მუშენი ვაკო რინა დო ფურცელეფს მუშენი კოროცხჷნს?
– ჯონსის მიორჩქჷ, ნამუდა მუჭოთ ჯას ეკონია ფურცელი გამუკოხორცქჷნ, თიშვანსჷნე დოღურუ.
– დო მუსხი ფურცელქ ასქიდჷ ჯას, ასე?
– ხვალე ართი. დო მემიჩქჷნ, თინა ხოლო გამუკოლუ ამუსერი.
– მუ ბოროია რე სქანი ჯონსი – თქუ ბერმანქ დო მიდართჷ.
გოთანდჷ. ჯონსიქ ოსინთეშე გეგმიჯინჷ, ცურუს ეკონია ფურცელი დიო ხოლო ქ’ასქილადჷდჷ.
აკისერჷ. ცურუს ეკონია ფურცელი კჷნე ქო მუკობუდჷ.
– ო, სიუ, ეკონია ფურცელი ხოლო ქო მუკობჷ, მუ ბოროია ვორდი, თელ სერს მერეთი ბორია რდჷ დო ხელერდი მიშჷ, ოდო ინას იშენით შური უდგჷ. ანწი ვა ბღურუქ მათ!”
მუსხირენი დღაშ უკული ჯონსი ექიმქ ქიძირუ. ქო მოურჩქილუ დო უწუ: ”ჩქიმი მაჸალე, უკვე ჯგირო რეთ დო უმოსი ბედინერი – ვინდარო ბერმანინ”.
– ბერმანიო? მუქ აღოლჷ? – ართბორჯულო ქიკითხეს ცირეფქ.
– ვა გიჩქჷნანო? ბერმანქ ღუმენჯი სერს დოღურჷ.
– ბერმანქ ღურუო?! ქო მარა მუშენი?
– მუსხირენი დღაშ წოხოლე ოჭუმარეს, მეძობელეფქ ოზეს ქო მუწახვილეს. ედომუშამო შოლირი რდჷ დო გოჸინილი. ხასჷლას ტკვა გეძჷდჷ, თექინეშეს – დინცხიშფერი დო ჸვინთელი ოღაფულა. მითინს ვა უჩქჷ მუს ორთჷდჷ თინა სერითჷნ. მითინს ვა უკითხირჷ. კათას ვა უჸორდჷ თინა. ბადიდი ბერმანი ეგოისტი რდჷ.
– სიუქ ნჭაფიერო გამუწოსხაპჷ დო ოსინთეშე გეგმიჯინჷ. ქუაშ კიდალას ხიროკილ ცურუ გოკარკატუდჷ, ნამუსჷთ აკა კაკალია ჸვინთელი ფურცელი ქ’ასქილადჷდჷ. ეკონია ფურცელი. სიუქ ფურცელს ქო დეკვირჷ, მარა მუთ ძირუნ ფურცელი ვა რდჷ ინა. ნახანტა გოხოლჷდეს, უსქვამაში ნახანტა. მოსოფელს ირიშ უჯგუში ნახანტა, ნამუდგაშ ხანტუათ რჩინი ბერმანს თოლშა ხოლო ვა აწარინედჷნჷ.
თარგმნა გიგა ქავთარაძემ
|
|
ნანახია: 1024 |
დაამატა: ოდორია
|
კომენტარის დამატება შეუძლიათ მხოლოდ დარეგისტრირებულ მომხმარებლებს [ რეგისტრაცია | შესვლა ] | |
 | |  |
|
|
