ედემ იზორია-ვადმარინე
ვადმარინე, იბდე ოკო მა სოთინი,
გური ჩქიმი უჩა მართუთ გინორთელე...
მუ ღირინი, მუ კეკინი, მუ სოფინი,
მუ გარდღეფი, მუ დონთხაფა, მუ მერთელი.

ოკო იბდე, ბორიეფი მესოფელე
ქომშვიტუანს დო მუნაფა მუნორთელი
ქიანაშა ქომფაფუანს ელე-ელე,
იბდე ოკო, იბრტე ოკო ჭარაშ მელე.

ვადმარინე იბდე ოკო მა სოთინი
ჩქიმი გური უჩა მართუთ გინორთელე

ჯგირობუა მუთა ბძირი
დო მუთ გაგიხარა გური,
უჩა ზღვაში წყარც წყათნცჷ
აიეტიში ჩილამური.

მა თი რჩქინას გივაµუნი
მუთ ჩქიმ ჯვაშიქ მოგურუნი,
მარა ვამიჩქ ელახშე
ჯიმა მუშენი მონდურუნი.

ამდღარ დღაშა ვეშმატყვინჷ
მუ პატონეფი ოსურუნი,
დუდ სომეხშა მიკუძუ დო
ლაზ-მარგალშა ოშქურუნი.

ათეჯგუაში მაძირაფუს,
ნოტე თოლეფი დომწკურუნი,
ჩქიმი ღურა ნოკობუე
უჩა შარა მოწურუნი.

ვანოჩქვენო, წყარიცალო
დოწენც რკინა, გონდღულუნი,
საქორთუო ვეჸუაფჷ
სამარგალო დოღურუნი.

* * *
აკაბურცხა სამარგალო,
აკა, ბუცუცუნია,
რაგადანა ლეხი რე დო,
მალას დოღურუნია.
ათეზმა გაჭირებას
თინა ვაგურზუნია...
ლეხ ვაბადენც სქუალეფც,
ლეხის უცენც მუნტურეფ,
უმინჯუროი მეტებული,
ქომწი შურო მუთუ რექ.
სო დარღვი სოლე მარღვი
ათეზმა უთურეფი...
ქორჭკუმუნა სქან ტანიშე
გიშნაულა მუნტურეფი.