ნინას, ნამუს ბრაგადანქჷნ,
გურწყურგილშე ეშმაფუნცჷ,
კინოხონიშ კინჷნაჩველი -
აშო წკონდათ ეშმაპუნცჷ.

ნათქუელ რე, ნარგის წყარი
ვალუბიდა ვაფალუნცჷ,
ნინაშ მაწყარალი მი რე -
ქიმშანთხაფენ მარგალ ლურცჷ?

ნინა ჩქინი ღმალა რე დო
მუკულუათ მარგალურცჷ,
ნქირაშ შარას გიორე დო
უკულ, შურო მი თვალუნცჷ?!

დღალეფჲ ხესჷ მიკინებუ,
გინმოფაფჩჷნქჷ კარტიცალო,
ბაღანობას მირკინებუნ,
გჷმაშინე მა თი ცალო -

ითამ ასე მოხვადჷკო,
ბორჯიშ გინიბრთჲ გაძიცალო…
ღურას ვიშო აფხვადჷქო,
ნარღის გურიშ ცელით ბცალუ!

სო რე ასე ჩქიმ ჸოროფილჲ
ჩქიმდა კარკაცითჷ მალუ…
სერიშ ვითოჟირი რენ დო
გალე მითინჲ ვეგლევალუ.

მის გაგინე ჩქიმი ჭუა,
თეცალჲ ნიტე მი მაპალუ,
გოკონჲ მიბლე თელჲ ქიანა -
ბჟაეიოლ დო ბჟადაალუ…

ლჷმას ვორექ მუზეფწკჷმა,
ქაშმოფორჩეს შურიშმალუ -
არწოს დინა მელუნია
მით მუშ ნინას ვანინალუ!

თაშ მიწის დო დჷმორთინეს,
გომგინძორეს რინაშ ღალუ,
მა თინეფიშ ეკნაჩინა,
ამარჲ თქვანდა ქჷმომღალუ…