შურობუმუში მინდორეფც
შურიში შარეფი გაფჷ ნალჲ,
მიქ მერკვათ ფსუალეფი
მურიცხეფშა მაფურნალჲ.

სქან ოცქვაფურ ისტორიას
ხეჭკურელო მუკურექ,
გოღანერი კოლხიში სქუა
ამდღა ჭიჭე ძუკუ რექ.

ქოგურაფუქ აგაგას,
უჩხონჩხე დო უგურეს;
თელეფწკუმა რგორი, მარა
ლეგენდეფშა მოწურეს.

სქან დინაფას თე ქიანას
შურო მითინ ვანარღენც,
ბორო რექ დო ეშმაკის
გიძახნა გამაღეთ.

დოღურიდა მუ გიწუა,
მეტის ვადოიბანძღუანქ,
ოცქვენი გვალო ქჷდგარულ,
გებ მოირთას ლანძღუაქ.

ორთა სუალეფს უფათქუანც,
ფირქეფი მუკობუ ცას წილამურო.
ჩე ჯაშ ნოელეფს გილაღვარღვალ
ათე ნაბირა ჩხე ჩილამურო.
ჩქიმი ლერსეფი ცაშ ობინეხეს
მუკოჭვიანა ყურზენ–ყუბერო,
მუ შვანც ღორონც შურც დურთინუანქნ,
კინე გინმოშკვანც დიხაჭუბერო.

ჭარა ხაბოშე მოკერკელუანც,
ფუთქურ მოლებულ ჭიჭე ქუას.
ათე ბორია სუას მეპტახუნც,
ამარ მოლიმ დო მიქინძუანც.

ირო მისხუნუ დღალეფი მობრდენი,
ბრელ მიძირუ დო ბრელით ბდინაფუ.
სოლე მობრთინ დო სოლე იბდენი,
ირფელ ართიანც ქიმენქირაფუ.
შურიში ტორონჯი ცაშე მიჯინე,
თექ ხოლო ნოღვე ირფელც აკართუ.
მა თი შარას თოლი ქუკინდე,
თანთე მუნაფას ნამუთ აკათუ.

ამარ გევორექ რზენიშ ოხურგეს,
შურ მიკიჩხილიტ , სორე ფაფალას.
კინ მაჟირაშა მა თაქ გობრჩქინექ,
თოლიში მერქას დო წუნიშ მამალას.

ქინოფსკიდი თორსა, ჩირეს,
დო ფირქეფით ხან მოკორდუ.
ბრელ მოკოდნ ბძირი ჭიჭე,
ჭიჭე ბძირინ, ბრელ მოკოდუ.

ვალიებე მიჩქუ ბრელც,
ცაშა გირძე შარა მებუ.
ვაწუოთა კირიბ გერც,
შურ ინგარც დო მეჩიებუ.

არძა მიჩქუ სორე ჭარა,
მიქ დინუ დო მიქ მორთუ.
ქიმკოჭვებუ დიხას ქვარა,
ისოფუ დო იკილოთუ.

კურცხე რინა ნოკობუე,
უკმელა დო უჩა სერც.
მინ მონჭა რე, მინ კობუ რე,
მუკმოლუ დო მუკმოცენც.

უბენარი ოფე ირო,
ლენიშფერ ცა– შურიში ონწე.
ჭვემათ მოულ, მინშა თირო,
ღორონთი არძა აკანც მორწყე.

ცას გეუნჯანქ ნოთე თოლეფც,
ეჰამებუ პეულც ჯინა.
გობჭყოლადუ მელენი,მოლენი,
მარა ართ დღას ქიგიბშინა.

გვიმარა
ოხვამერ ჯა რდი ,მარა
დეჩიჩიო, გვიმარა?
ვეკანგარა ირიათო
თი თუთა დო თი მარას,
ოხვამერ ჯა რდი, მარა
დეჩიჩიო, გვიმარა?!

ჩელაია ნირსი ცაშე მირაყვალუ,
გოკურცხია, დიდა ინგირ გირაქვალუ,
გლუაფირო,გოლუაფირო, ირო ფალუ,
კუჩხეფიშა წყურგილეფი ქუმოიდვალუ,
ოხვამერ ჯა რდი, მარა
დეჩიჩიო, გვიმარა?!

შხურის ტყების გეჭარუდუ სქან ნინაშა,
მუჭო ოკო ონდღულესკო ფულანდი!
ითამ კუჩხი გეიდგუმუდკო ტინტილაშა,
ეკორჩვილი გილეში დო ქულანდი!

შხურის ტყების გეჭარუდუ სქანობურო,
ორქო ქვიშაშ კორობუაშ წესეფი,
გიკურცხინე, გიკურცხინე, გოლუაფირო,
სი მუნაფას გიწილოხუნს მესეფი!
ოხვამერ ჯა რდი, მარა
დეჩიჩიო გვიმარა?!

ბირგულ მუშენ გიდირკუ,
კოლხურ ბირაშ მარჩქილეს,
ქარწყექ–ჰავაქ ქიდირქუ
ფსუა გეკოვარჩხილე!
ქიგიშინი ხიოლი,
რე მუმულიშ ყიონი,
მიბაღუნა ქირონი,
უზისხირე გვიმარა!

ნჭყოლირ გური ... კითხვის გაგრძელება »

მარგალც ნინა გოჭყოლად
მარგალც ნინა გოჭყოლად,
ორაგადე დოუთირუ.
ღვანწკის ართიქ ქოჭკადუნ,
მაჟირაქ მოუთირუ.
გერე ზისხირ სქირაფილი,
გაძიცალო გინორთელი.
ირფელი რჩქინა დინაფილი,
დუდიში ტვინი მინორთელი.
ათაში მუქუ დარაგუ,
არძა დუც მინოხენი.
ქარ–ბორია არაგუ
ზუღა სორე კინოხენი.
რჩქინათ იჩუალუდუა,
ასე მუდგას ბთქუანქნ.
ცაშა ქინჭუაფუქუდა,
მერტახუნა სუასნ.
ჩიჩიე დო ჩაჩანეფი
ათაში მუშენი იფაფუ.
სკანი ორქოში ნაჭარეფი,
მიშ ზუკოლით ირღვაფუ.
ისტორიას გითირანა,
თეს მუჭო მიარჩქვანი?
შხვეფი უმოსო იკვირანა,
სი იძახუქ მიაშკვანი.
ვავა, ლიბას ვაგშამირთას,
ლ იი დო მ რენია.
ათაში ჭყანას გაქშაიღანც
თე ჩიება მუ რენია.
ქორთუეფიში ონკარალი,
მანგარი ლასიში ტირანია.
არმენეფიში მოგონილი
ართიანი ვილანია.
ვარა მიქ გიმოდვეს,
ბჟაში სკუალეფც მარგალი?
ჩქი კოლხობა მიორდეს
ლინჯ– ფ ... კითხვის გაგრძელება »

ღურელც ტაბაკ მუშო ოკო
ვა ჸუმენს დო ვა შქირენს;
მარა თია ვეგლუდვენჲ
იშენით ვა შინერს.

მარდჲ ცოდათ გინუგაფჷ
ჯგირობუა ვარჩქინელს;
გურქ მოჲრთუ-და ვა დოჭყუა,
ჭყალა იშენ ვაშინერს.

შანქარქ გაჸუ ჭკომუნქჷ-და
ხუთინერს დო ამშვინერს;
მარა ომბოლც ხიტა ვარა
ვამკუტახე ვაშინერს.

კოჩჲ ტანიშ სინთელეს
ოდინუანს ორჩინელს;
უმინჯურო მიწოტება
ცოდა რე დო ვაშინერს.

სქან მაჸალეს გოუზგირტჲა
სოლედგარენ მაჩინეს;
კოჩქ დუდი ქიმგენდუ-და
გითოჩამა ვაშინერს.

გური აფუ ფშინაფილჲ
ჰარამ თოლით მაჯინეს;
მეძობელიშ ჯგირობუა
გოწყინდასინ, ვაშინერს.

ირფელ ართჲ გაფუდას
თენა ხოლო ვაშინერს;
ჸოროფა რე ოთასალჲ
უბადობას ვაში ნერჩჲ!

ლაშა გახარია-ოდაბადე
ჸა ოჭმარეს ზესქვ გილარხე,
ჸა ონჯუას -მალაღური…
სქან ოსქვებურ ვამათქუნი,
კოჩ თაშ მუჭო ალაბღური?!

ვართ მასქურო ეშმოლ შურქუ,-
ქიგნოირქიე თუმასჸნი:
სქან უჯგუშო მის უჩქ, ცაშა
მუ მეუღუ კუმასჸნი…

ნარღიშ ჸასჷ გილაჸონუნქ
პირსელიში მუმულჯგუა,
გინაიჸია სამარგალოს-
ჯგირობუას უკუჩხუა.

ირიკოჩიშჲ მენძელი რექ,
გოონჯღორუ სუმარუა;
ჭყოლირ გურიშ ლეცერი რექ,
ღურუს ცურუს უვარუა.

ანწ ვარენო ქომკითხენ დო,
ქიგლულ, ქიგლებლანთირუქჷ…
ოშ ქიანა მიბლი, მარა
ნამთინიშა ვამთირუქჷ…

რუმე სერიშ ლანდღვერ თოლცჷ
თუთაქ სინთე ქალაჭვალჷ;
ჭველეფ ნირსი გეგნიცხონესჷ
მურიცხეფი იჭვარჭვალჷ,

ჭილამ ნეძიქ გამკოლჷ დო
ჸურუმ ქუას გიკაჭალჷ
აურე ხობწყარ მოშინთანცჷ
ევრე მაფერ მიკვაჭალჷ;

სოფელც კამაცალო ლურცჷ,
ელვოჯინექ აკან ცასჷ,
წიწინაფილ ჩაფლა ლუღის,
ბერწულ ათაკარკაცანსჷ.

თუთარჩელა მუნმოქუნცუ,
თოლ მეთხოზჷ ნაკვაცასჷ;
დია,მურე ათე ორთა-
ირფელც მუჭო დაკვაწანსჷ?!

ლანჯეფი დო თხომუეფი,
ოჯალეშით გონაბადე,
მალას მაჭარ გობორდიშანც-
ბრელ ბორულიშ მორაგადე

გედ შქჷრენი,თე ტაბაკი
ჯგირ დო სქვამით მორაბადე;
გაკოკურცხით ჯიმალეფი,
დომხვამითჲ ოდაბადე!