|
|
 | |  |
| მთავარი » 2012 » სექტემბერი » 06 » ლაშა გახარია– მარგალური
8:25 PM ლაშა გახარია– მარგალური |
მარგალური ჯვეშ ნინა რე -
ქორთულიში ჯერღვი - ჭვერხი,
ორჩქილეთ - საღორონთო,
ვაუწყორუაფ ჭვახე რეხი.
მინ - ზესქვიშ ჩილამური,
მინ - პელეტი დო მერეხი,
ქოთ - პეული, ქოთ - ჭუჭელი,
გურც ეფალირ შურ-ბინეხი.
მარგალურ გვალო შხვა რე, -
ართო ბჟა დო ართო ცა რე,
დიდაშ ფართო კართე რე დო
მუმაშ yვანა დო ფაცხა რე.
yოროფაში წყურგილე დო
ღორონთიში აბარწა რე,
უჩა ბორჯიშ ალნანგარა,
გურიშ ელნაკარკაცა რე.
ჩქიმ მარგალურ სხუნილი რე -
კაჭალია ლაკადური,
ყამბარულო ნაფურცელა, -
სოთინ ვახოლ ნახაფული.
ხათე მანჯღვერც დუგორუნც -
სიტყვას შარა აკართუნი...
ნჯღელ ზღვას ხოლო მიშარჩქინდ -
წკონდა წყურგილ ქაკათუნი.
ნინას ხოლო ნოკობუე
ბარგუა დო მაჟირუა,
ტყაში გითოტიტონუა,
წყარუა დო ლაჟირუა.
უმინჯ yვანა, გამგონებუ,
სარდაკიაქ დაჟღირუა...
ქემინჯი დო გაქშაბირცხე -
უმოღე დო ნაჟირუა.
ბრელც ვაუჩქ მარგალური,
მიშემონტყორ ძათანძალო,
წოლერ yვალი ცხვინც მებუ დო...
თუდო ღუმუს ნტყვილუნც - ფალო.
გინძე ხერხალც ელაბირძღ -
ათოღანძგილ ხაჯიცალო,
უმოღეს ბურდღინუნც -
ქიანაში გაძიცალო.
ნინა ჯგირო ვაიჩქუდა,
ჭარაშ ძიცას ვეიაზადა,
სქან ტაბაკის ქიგნაჯინი,
გეგნილერჭყვე გინძე მადა.
ღორას წყარი მესქირუნი,
ქიგილადგუმუ სქიბუს ზანდა,
ლერსი ვარი, ლებია ვერგ -
ოგურიათ ელნაზადა.
მინ მელერსე მარგალურც
ტუტას მიშუტყურუანც,
ჭყონიშ დაჩხირც - ალიაკონც,
თხომუს მიშუტურუანც.
მარჩქილეს ორტინუანც,
წისქვილც ქიმკარულუანც,
თიცალს თქუანს, ყვარიას
კუდელც გეუფურუანც...
მინცი თოფო გილუღ, მარა
იშენ ვა რე მონადირე,
შხვაშ ნოტყელც გაზუმინუ
მუჭოთ ჭანდი - მოლადირე.
თოლი არძას ალაბრსხუნა,
მარა ზღვა-ქვინც აკა ორწყე...
ჭიფელია ჭინიშ ღობერ
სქვამას ირკოც ვაწკიროწკე.
ბრელ იბურჭულ, მარა ლარჩვი
ბოყვ-ყამბარო ვადაროწკე,
გეშქირატილ ყებურიშო
ხინკ-ლახვაცა ვაკაბოწკე.
ანწ ქიკითხით: მუ ოკონი,
კვანწილ ლერსიშ ღობუას,
დორჯგიმილ ბარჯგეფიშ
ზღონდით გინოზღონდუას.
წვანდიშ მოზგუმონჯუას დო
ლაბახათ ჭოფუას,
უხუჯური ქარეფიშა
ბირცხაში მიკოსოფუას?!
|
|
ნანახია: 646 |
დაამატა: ოდორია
|
კომენტარის დამატება შეუძლიათ მხოლოდ დარეგისტრირებულ მომხმარებლებს [ რეგისტრაცია | შესვლა ] | |
 | |  |
|
|
